ဖေဖော်ဝါရီ ၂၃ ၊ ၂၀၂၆
CC (VOM)
ဒီကနေ့ ဖေဖော်ဝါရီ ၂၃ ရက်မှာ စတင်ဖြေဆိုနေတဲ့ အတန်းတင်စာမေးပွဲမှာ စစ်ကိုင်းမြို့ ၊ ထက်ကိုယ်ပိုင်အထက်တန်းကျောင်းက ခုံနံပါတ်နဲ့ ဖြေဆိုခွင့်ကတ် ထွက်ပြီးသား G5 နဲ့ G9 ကျောင်းသားကျောင်းသူ ၁၆၁ ယောက်ကို သက်ဆိုင်ရာ စာဖြေဌာနက စာမေးပွဲဖြေဆိုခွင့် မပြုဘဲ ပြန်လွှတ်လိုက်တာကြောင့် ကလေးတွေ နစ်နာရတယ်လို့ ထက်ကိုယ်ပိုင်ကျောင်း ကျောင်းအုပ်ကြီးဆီက သိရပါတယ်။
ဒီကနေ့ ဖေဖော်ဝါရီ ၂၃ ရက်နေ့ မနက်ပိုင်းမှာ G5 ကျောင်းသူကျောင်းသား ၇၂ ယောက်နဲ့ G9 ကျောင်းသူကျောင်းသား ၈၉ ယောက်ဟာ စာမေးပွဲဖြေဆိုဖို့အတွက် သက်ဆိုင်ရာ စာဖြေဌာနကို သွားရောက်ချိန်မှာ ဖြေဆိုခွင့်မပြုကြောင်းပြောဆိုခဲ့တာ ဖြစ်တယ်လို့ သိရပါတယ်။
” ကျောင်းကို နှစ်သုတ်တက်ဆိုပြီး ဖွင့်ခဲ့တယ်။အဲဒါကို စာနဲ့မဟုတ်ဘဲ ပါးစပ်နဲ့ ၈ လပိုင်းကျမှ တသုတ်တက်ဆိုပြီး ပြင်ခိုင်းတယ်။ တို့က ဇွန်လထဲက ကျောင်းသားလက်ခံပြီးသားလေ။ ၉ လပိုင်းဆန်းမှ ဒီကလေးတွေ ဘယ်သွားလို့ရမှာလဲ ။မရတော့ဘူးလေ။အဲအချိန်မှာ မြို့နယ်ကလက်မခံလို့တိုင်းဒေသကြီးညွှန်မှူးဆီ အမြဲတမ်း ပို့တယ်။ဒီမှာဖြေတာတွေပို့တယ်။ အဲဒါပြီးတော့ ဒုဝန်ကြီးဆီကို တင်ပြခဲ့တယ်။ ကျန်တဲ့ကလေးတွေက ဒီကလေးတွေပါ ။ဒီကလေးတွေ ဖြေဆိုခွင့်နစ်နာမှာစိုးလို့ တင်ပြခဲ့တယ်။ပြီးတော့ ခရိုင်နဲ့မြို့နယ်က ၁၉ ရက်နေ့မှာ ခုံနံပါတ်ထွက်ပေးလိုက်တယ်။ ဖြေဆိုခွင့်ဆိုပြီးတော့။ ကလေးတွေရဲ့ဖြေဆိုခွင့်ကပ်ပေးလိုက်တယ်။ စာဖြေဌာနတွေလည်း ကပ်ပေးထားတယ်။ ကျောင်းမှာလည်း ကပ်ပေးထားတယ်။၂၁ ရက်နေ့ကျတော့ ယာယီဖြေဆိုခွင့်ကတ်ကို ကျောင်းသားတိုင်းကို ပေးပြီးသွားပြီ။ကနေ့ ၂၃ ရက်နေ့ မနက် ၇ နာခွဲ ၈ နာရီလောက် စာမေးပွဲဖြေဖို့ ရောက်သွားမှ ဒီကလေးတွေက အရင်စာရင်းသွင်းထားတာမဟုတ်လို့ ဖြေဆိုခွင့်မပြုဘူးလို့ ပြောလိုက်တယ်။ ” လို့ ကျောင်းအုပ်ကြီးဦးခင်မောင်ရေး က ပြောပါတယ်။
ခုံနံပါတ် ၊ ဖြေဆိုခွင့်ကတ်တွေ ထွက်ပြီးသား ကျောင်းသားကျောင်းသူတွေကို စာမေးပွဲဖြေဆိုခွင့်မပေးတာကြောင့် ကျောင်းသားတွေအတွက် နစ်နာမှုရှိတဲ့အတွက် ကလေးမိဘတွေက ကျေနပ်မှုမရှိကြောင်းနဲ့ ခုလိုလုပ်တာဟာ မူဝါဒအရမဟုတ်ဘဲ ထက်ကိုယ်ပိုင်ကျောင်းအပေါ် ပုဂ္ဂိုလ်ရေးအရ လုပ်တာဖြစ်တယ်လို့ ယူဆကြောင်း ကျောင်းအုပ်ကြီးက ဆိုပါတယ်။
” ကလေးတွေကို ဖြေဆိုခွင့်ပေးရမယ်။ အကယ်၍ ကလေးတွေမှာ အချက်အလက်တွေ မပြည့်စုံရင် သူတို့ဘာသာ အောင်စာရင်းမှာ ချန်ထားရင် ကျေနပ်တယ်။ မိဘတွေလည်း ကျေနပ်တယ်။မူဘောင်ဆိုတာ တပြေးညီတည်းဖြစ်ရမယ်။ မူဆိုရင်လုပ်လိုက်။ စစ်ကိုင်းမှာကျောင်းမတက်တဲ့ ကိုယ်ပိုင်ကျောင်းတွေရှိတယ်။အဲဒါတွေလည်း ဖယ်ပစ်လိုက် ။ဒီကျောင်းတခုတည်းကို ပုဂ္ဂိုလ်ရေးအရ လုပ်တာတော့လက်မခံနိုင်ဘူးလေ။ ဒီကလေးတွေကို သူတို့လုပ်ချင်ရင် ၁၉ ရက်နေ့ကတည်းက ခုံနံပါတ်ထွက်မပေးနဲ့တော့လေ ။ ခုံနံပါတ်တွေလည်းသိပြီးပြီ။ ဖြေဆိုခွင့်ကတ်တွေလည်းကိုင်သွားတဲ့အချိန်မှာ ကနေ့မနက်မှ ကပ်ဖြုတ်တာဆိုတော့ ဒါက ပုဂ္ဂလ်ရေးအရဖြစ်သွားပြီလေ။ ” လို့ ထပ်မံ ပြောပါတယ် ။
ဒါကြောင့် ကလေးတွေ စာမေးပွဲဖြေဆိုခွင့်ရရှိရေးအတွက် ကလေးမိဘတွေရဲ့လက်မှတ်နဲ့အတူ ပညာရေးဝန်ကြီးဌာန ပြည်ထောင်စုဝန်ကြီးကို တင်ပြပြီး မိတ္တူကို ဒုဝန်ကြီး ၊ တိုင်းဝန်ကြီးချုပ်၊ တိုင်းပညာရေးမှူး ၊ ခရိုင်အုပ်ချုပ်ရေး ၊ ခရိုင်နဲ့ မြို့နယ်ပညာရေးမှူးရုံးကို တင်ပြတောင်းဆိုသွားမှာ ဖြစ်တယ်လို့ သိရပါတယ် ။
VOM အနေနဲ့ စစ်ကိုင်းတိုင်းပညာရေးမှူးရုံးရဲ့ သဘောထားကိုသိနိုင်ဖို့ ကြိုးစား ဆက်သွယ်ပေမယ့်ဖြေကြားမပေးတာကြောင့် တိုင်းပညာရေးမှူးရဲ့ အကြောင်းပြချက်ကို သေချာမသိရသေးပါဘူး။
ဓာတ်ပုံ – ထက်ကျောင်းအုပ်ကြီး
